Gras fyrir menn
Í Danmörku vinnur vísindafólk á vegum háskólans í Árósum að einkar áhugaverðu verkefni en það gengur út á að þróa aðferð sem gerir prótein úr venjulegu grasi nýtanlegt fyrir fólk.
Á það að koma í stað annars plöntupróteins, eins og frá sojabaunum eða ertum. Samkvæmt frétt Maskinbladet.dk er um gríðarlegt hagsmunamál að ræða, enda má draga verulega úr sótspori plöntupróteins í norðurhluta Evrópu ef árangur næst. Þar er nefnt hátt sótspor sojabauna sem oftar en ekki koma langt að.
Aðferð vísindafólksins byggist á því að vinna próteinríkan safa úr grasinu sem svo er skipt upp í tvo hluta. Annars vegar prótein sem nýtist fyrst og fremst einmagadýrum eins og hænum og svínum og hins vegar prótein sem nýtist fólki.
Vandamálið við framleiðsluna, hingað til, hefur verið sú staðreynd að próteinið sem ætlað er fyrir fólk hefur haft sterkt bragð af grasi.
Nú hefur vísindafólk háskólans náð afgerandi áfanga í þessari viðleitni, þ.e. að gera grasprótein nýtanlegt fyrir fólk, en áfanginn felst í því að þeim hefur nú tekist að framleiða grasprótein sem ekki bragðast eins og gras. Próteinið er sem sagt bragðlaust og er því mögulega tækt til matargerðar.
Danir horfa hýru auga til vinnslu á próteini úr grasi, ekki einungis til þess að geta nýtt það í matargerð heldur ekki síður sem prótein í fóðri búfjár og munu þarlendir bændur því verða enn sjálfbærari. Fyrir land eins og Ísland, þar sem gras vex í miklum mæli og víða vannýtt en grasgæft land, gæti þessi nýja aðferð opnað á ótal áhugaverða möguleika fyrir bændur landsins.
