Fengju reikning fyrir skemmdum með nýju frumvarpi

Stjórnvöld fengju auknar heimildir til að bregðast við ólögmætum utanvegaakstri ef frumvarp umhverfis-, orku- og loftslagsráðherra nær fram að ganga. Frumvarpið er til kynningar í Samráðsgátt stjórnvalda.

Frumvarpsdrögin fela í sér margháttaðar umbætur á náttúruverndarlögum og lúta meðal annars að uppbyggingu innviða, landtöku farþega úr skemmtiferða- og leiðangursskipum á friðlýstum svæðum og skýrari heimildum til friðlýsingar og friðunar í hafi. Þar eru jafnframt lagðar til breytingar er snúa að úrræðum stjórnvalda til viðbragða við ólögmætum utanvegaakstri.

„Skussarnir“ sviptir ökutæki sínu

Síðasta sumar voru erlendir ferðamenn staðnir að grófum og ítrekuðum utanvegaakstri og hlutu fyrir það sektir, þegar lögregla náði af þeim tali. Í kjölfarið lýsti Jóhann Páll Jóhannsson, umhverfis-, orku- og loftslagsráðherra, því yfir að taka þyrfti fastar á slíkum brotum. „Ólögmætur utanvegaakstur er óþolandi og á ekki að líðast. Þess vegna þurfa stjórnvöld að hafa raunhæf úrræði til þess að taka fastar á skussunum og senda þeim reikninginn vegna tjónsins sem þeir valda. Og þegar ökumenn hlýða ekki fyrirmælum verður lögregla að geta haldlagt ökutæki strax og komið þannig í veg fyrir frekari brot. Um þetta snúast lagabreytingarnar,“ segir Jóhann Páll.

Með nýju frumvarpi yrði Náttúruverndarstofnun heimilt að annast nauðsynlegar úrbætur á verulegum nátturuspjöllum vegna utanvegaaksturs og krefja hann sem veldur spjöllunum um kostnað við úrbæturnar. Jafnframt er lagt til að lögregla fái heimild til haldleggja bílinn sem olli skemmdunum tímabundið. Þá verði viðurlög vegna brota sem valda alvarlegum náttúruspjöllum hert og samræmd viðurlögum samkvæmt öðrum lögum á þessu sviði.