Sóknargjöld hækkuð um 200 milljónir króna

Ein af þeim tillögum sem lögð er fram í tengslum við fjárlagafrumvarp næsta árs er að sóknargjöld verði hækkuð um 200 milljónir króna. Einnig stendur til að veita 75 milljónum króna aukalega til Húsfriðunarsjóðs til að standa straum af viðhaldsþörf á friðuðum kirkjubyggingum um land allt.

Mikið ákall hefur verið síðustu ár frá kirkjunnar fólki um hækkun sóknargjalda og er nú líklega að raun- gerast. „Þetta er mikið fagnaðarefni. Sóknargjöld standa undir mikilvægu starfi trúfélaga um land allt og lengi hefur verið kallað eftir því að fjármögnunin verði styrkt og gerð fyrirsjáanlegri,“ segir Þorbjörg S. Gunnlaugsdóttir dómsmálaráðherra. Hún segir jafnframt að tillögurnar byggi á vinnu starfshóps sem skipaður var árið 2024 af þáverandi dómsmálaráðherra um endurskoðun fyrirkomulags sóknargjalda.

1.270 krónur á mann

Verði hækkunin að veruleika er gert ráð fyrir að fjárhæð sóknargjalds hækki úr 1.221 krónu í 1.270 krónur fyrir hvern einstakling á mánuði. Ný upphæð á að uppfærast ár hvert í samræmi við almennar verðlagsforsendur fjárlaga og fjölda greiðenda sóknargjalda í lok næstliðins árs. Breytingin á þannig að stuðla að fyrirsjáanlegri fjármögnun til framtíðar.

Friðaðar kirkjur

Víða um land er töluverð viðhaldsþörf á friðuðum kirkjum sem gegna mikilvægu hlutverki í menningar- og byggingarsögu landsins. Starfshópurinn lagði því til að Húsfriðunarsjóður yrði efldur með varanlegu viðbótarfjármagni sem eyrnamerkt yrði kirkjubyggingum og er í fjárlagafrumvarpinu 2027 gert ráð fyrir 75 milljóna króna viðbótarframlagi.