Spamalot í Eyjum

Leikfélag Vestmannaeyja hefur verið að æfa af krafti undanfarnar vikur söngleikinn Spamalot sem frumsýndur verður á skírdag, þann 28. mars nk.

Fjallar verkið um leit Arthúrs konungs og riddara hringborðsins að hinu helga grali, en breska tón- og leikskáldið Eric Idle vann söngleikinn upp úr kvikmyndinni Monty Python and the Holy Grail árið 2004. (Þá mynd gerði Eric einmitt árið 1975 ásamt félögum sínum í Monty Python-hópnum sem margir kannast við.)

Er þráður söngleiksins gæddur einu víðfeðmasta hugarflugi sem um getur, þar sem miðaldamenningu er blandað við alls kyns vitleysisgang. Segir í erlendum ritdómi frá árum áður að „Kvikmyndin Monty Python and the Holy Grail not[i] óvænta rökfræði sem og óvænta atburði til að afhjúpa fáfræði mannkyns á miðöldum“. Hvort sem það stenst nú eða ekki. Annars, til gamans má geta þess að nafnið Spamalot kemur úr bíómyndinni þegar einn karakterinn segir; „I eat ham and jam and Spam a lot.“Þrátt fyrir ýmis furðulegheit hefur Spamalot verið sýnt við miklar vinsældir víða um heim og hlotið bæði Tony-verðlaunin og Drama Desk-verðlaunin sem besti söngleikur ársins 2005.

Eitt er víst að án efa verður mikið hlegið á sýningunni. Haft er eftir leikstjóra verksins, Stefáni B. Vilhelmssyni, að líklegast sé sýningin síður barnvæn enda nokkuð um svartan og klúran fullorðinshúmor. Þetta er þó líflegur og afar skemmtilegur söngleikur sem börn gætu vel haft gaman af. Alls taka um 40 manns þátt í sýningunni, um 20 á sviði en einnig vinna margar hendur á bak við tjöldin. Í áhugaleikhúsum geta nefnilega nánast allir fundið sér starf innan síns áhugasviðs, hvort sem um ræðir leik, stjórnun ljósa, gerð búninga eða leikmyndar, sjá um tónlist og þar fram eftir götunum.

Stefán, sem er mikill áhugamaður um byggingu leikmynda, hrósar samstarfinu milli leikdeildarinnar og Fab Lab (Fabrication Laboratory) smiðjunnar sem staðsett er í Vestmannaeyjum. Fyrir þá sem ekki vita er þar hægt að fá aðgang að smiðju með tækjum og tólum til þess að hrinda hugmyndum sínum í framkvæmd auk aðstoðar fagmanna.

„Svo er einn vinkill sem er svolítið skemmtilegur. Við erum að vinna mjög mikið af leikmynd og propsi í samstarfi við Fab Lab í Vestmannaeyjum þar sem við fáum aðstöðu og ekki síst aðstoð við að koma hugmyndum frá blaði til veruleika. Ég hef, kannski meira en góðu hófi gegnir, gaman af því að byggja viðamiklar og flottar leikmyndir og fæ hérna tækifæri, en í Fab Lab er aðstaða sem er algjörlega stórkostleg þegar kemur að hönnun og frumsmíði á alls konar leikmunum og leikmyndatengdum hlutum. Bæði geta allir fengið að koma og nýta aðstöðuna en þar er líka til staðar þekking og kunnátta sem fólki býðst að nota. Og það er hægt að gera svo rosalega margt þar að þegar fólk með hugmyndir mætir þarna inn líður manni eins og allt sé hægt,“ segir Stefán að lokum.

Sýnt verður í Heiðarvegi 19, Vestmannaeyjum. Frumsýning er 28. mars og næstu sýningar: 29. mars, 30. mars, 5. apríl, 6. apríl og 12. apríl – allar sýningar kl. 20. Lokasýningarnar eru svo þann 13. apríl klukkan 18 og 21.00 og miðasala milli 16–20 alla daga frá 26. mars í síma 852-1940.