Safnar saman þekkingu um alþýðulækningar
Skoða á hefðir og notkun óhefðbundinna lækninga á Íslandi í norrænni rannsókn. Agnete Egilsdatter Kristoffersen, doktor í læknisfræði, ferðast nú um landið og leitar að viðmælendum sem nýta sér alþýðulækningar sér til heilsubótar.
Alþýðulækningar er skilgreint í orðasafninu Læknisfræði sem notkun úrræða og læknisdóma alþýðu manna til að meðhöndla kvilla og sjúkdóma. „Alþýðulækningar á Íslandi eru ekki aðeins safn aðferða og þekkingin hefur oftar en ekki verið miðluð milli kynslóða. Lækningarnar eru fjölbreyttar, eins og notkun á lýsi vegna ríks omega- 3 fitusýra, notkun blóðbergs vegna sýkladrepandi eiginleika þeirra og neyslu íslenskra berja fyrir andoxunareiginleika þeirra.
Jarðhitavatn er einnig órjúfanlegur þáttur í hefðbundnum íslenskum lækningum, það er talið hafa lækningamátt sem stuðlar að líkamlegri og andlegri vellíðan,“ segir Agnete en hún leiðir rannsóknina sem unnin er í samstarfi við fræðafólk á Norðurlöndunum, m.a. með Þóru Jennýju Gunnarsdóttur, prófessor við Háskóla Íslands.
Lítil vísindaþekking til staðar
Agnete hefur unnið á fræðasviði óhefðbundinna lækninga í tuttugu ár en hún starfar við háskólann í Tromsö. Tildrög rannsóknarinnar á rætur að tekja til ráðstefnu sem hún sótti á Ítalíu í september síðastliðnum, tileinkuð alþýðulækningum. Þar varð hún þess áskynja hve víðtækt rannsóknastarf er unnið á sviði slíkra lækninga frá Austurlöndum. Hins vegar hafi verið skortur á notkun aðferða innan Evrópulanda. Hún kallaði því til vísindamenn frá Norðurlöndum til að hefja þá vegferð að taka saman og skoða norrænar hefðir og notkun alþýðulækninga.
„Við viljum skoða hvaða hlutverk alþýðulækningar gegna í dag til að viðhalda heilsu og meðhöndla veikindi,“ segir Agnete.
Leitar að fólki með þekkingu
„Við erum að leita að fólki sem hefur kunnáttu á og nýtir sér alþýðulækningar. Fólk sem hefur lært það heima við í uppeldinu, en ekki þau sem öfluðu sér þekkingar til dæmis á námskeiðum síðar. Þetta getur til dæmis verið fólk sem safnar villtum jurtum og nýtir þær sér á einn eða annan hátt. Við erum að leitast eftir að fá skilning á persónulegri reynslu þátttakenda og út frá þeim safna upplýsingum til að svara rannsóknarspurningum.“
Þau sem hafa áhuga á að afla sér frekari upplýsinga um rannsóknina og vera mögulega viðmælendur er bent á að hafa samband við Agnete í gegnum netfangið agnete.kristoffersen@uit.no eða í s. +47- 997-01344.
Agnete talar góða íslensku. „Ég vann hér á býli í Reykhólasveit fimmtán ára gömul í heilt ár. Ég hef viðhaldið íslenskunni síðan þá og kem reglulega til landsins,“ segir Agnete sem stundar íslenska hestamennsku heima við í Tromsö.
