Leikfélag Sauðárkróks sýnir Ronju ræningjadóttur

Leikfélag Sauðárkróks var upphaflega stofnað 13. apríl árið 1888, lagt niður tæpum tuttugu árum síðar og svo endurstofnað þónokkru síðar. Eins og fram kemur í dagblaðinu Degi árið 1935, hefur leikfélagið sett upp verkið „Hveitibrauðsdagar“ eftir Björnst Björnson, í leikstjórn Magnúsar Jóhannssonar læknis og mikils áhugamanns leiklistar. Það hlaut „ágæta dóma“ og leikendur „búnir til leiks af alúð og nákvæmni“.

Formlega var svo leikfélag Sauðárkróks skráð til starfa árið 1941 og fagnar því 80 árum í ár. Haldið var upp á afmælið síðastliðið vor með heimsfrumsýningu leikritsins „Á frívaktinni“ eftir Pétur Guðjónsson og nú með seinni sýningu ársins heldur afmælisgleðin áfram. Leikfélagið, sem er ríkt af hæfileikaríku fólki og eitt virkasta áhugamannafélag landsins, setur að jafnaði upp tvær sýningar árlega, en seinni sýning ársins er verkið um hana Ronju Ræningjadóttur sem flestir landsmenn kannast við.

Alls 24 leikarar taka þátt í þeirri uppfærslu og ganga í hvorki meira né minna en 33 hlutverk. Alls koma um 60 manns að sýningunni enda viðamikil bæði innan sviðs sem utan. Ronja er skemmtilegt og fallegt leikrit sem hentar öllum aldri, en gott er að undirbúa yngstu leikhúsgestina örlítið þar sem koma meðal annars nornir og grádvergar við sögu og geta valdið því að fólki bregði! Frumsýnt verður 5. nóvember, sýningartíma má sjá í dálki hér til hliðar en miðapantanir eru í síma 8499434.