Kaupfélagið: Jón Gnarr ræðir um bílljósanotkun og landnám Íslands
Jón Gnarr hefur dvalið á óðali sínu í Skorradalnum síðustu tvær vikurnar, fjarri öllu kórónufári í sjálfskipaðri útlegð frá höfuðstaðnum. Hann sætir lagi og mætir í hlaðvarpsstúdíó Bændablaðsins á milli apríllægða þar sem hann hleður í hnausþykkan páskaþátt. Jón ræðir um tvö mikilvæg hugðarefni sín: bílljósanotkun og landnám Íslands.
Jón dregur í efa að Ingólfur Arnarson hafi verið í hringabrynju þegar hann kom hingað til lands og enn síður að hann hafi staðið í stafni á skipi sínu með atgeir og hjálm eins og styttan fyrir utan Hallgrímskirkju gefur til kynna. „Hver siglir í kringum Ísland með járnhjálm á höfðinu? Ekki nokkur einasti heilvita maður! Hjálmur er eitt það versta sem þú getur verið með á hausnum í pusi þegar skvettist yfir þig sjór. Hjálmur er ekki að verja þig neitt og hann er úr járni sem verður ógeðslega kalt. Ég er ekki að segja að Ingólfur hafi ekki getað átt svona hjálm, einhversstaðar í tösku á knerrinum sínum, einn hjálm og mögulega eina hringabrynju.“
Hægt er að heimsækja Kaupfélagið í öllum helstu hlaðvarpsveitum eða í spilaranum hér undir.