Verð á mjólk hækkar um áramót
Verðlagsnefnd búvara hefur tekið ákvörðun um að hækka lágmarksverð mjólkur til bænda og heildsöluverð á mjólk og mjólkurafurðum sem nefndin verðleggur. Lágmarksverð mjólkur til bænda hækkar um 2,5%, úr 90,48 kr. í 92,74 kr.
Heildsöluverð mjólkur og mjólkurafurða, sem nefndin verðleggur, hækkar um 2,5%. Þær vörur, sem eru undir ákvörðun verðlagsnefndar, eru m.a. drykkjarmjólk, rjómi, hreint skyr, smjör, nýmjólkurduft og tvær tegundir af ostum með fituinnihaldi 45% og 30%. Verðbreytingar munu taka gildi 1. janúar 2020.
Gjaldaliðir hafa hækkað umtalsvert
Í fréttatilkynningu frá verðlagsnefnd segir að verðhækkunin sé til komin vegna kostnaðarhækkana við framleiðslu og vinnslu mjólkur, en síðasta verðbreyting fór fram 1. september 2018. Frá síðustu verðlagningu hafa gjaldaliðir í verðlagsgrundvelli kúabús hækkað um 5,9% og reiknuð hækkun vinnslu- og dreifingarkostnaðar afurðastöðva hækkað um 5,2%.
Verðlagsnefnd búvara er skipuð af landbúnaðarráðherra og starfar samkvæmt ákvæðum búvörulaga. Hún er skipuð sex mönnum og ákveður afurðaverð til búvöruframleiðenda og verð nokkurra búvara í heildsölu.