Mikil mengun í jarðvegi á Heiðarfjalli í Langanesbyggð
Rannsóknir á Heiðarfjalli í Langanesbyggð benda til þess að svæðið sé mjög mengað eftir að bandaríska herliðið rak ratsjár- og fjarskiptastöð á fjallinu á árunum 1954 til 1970.
Á heimasíðu Umhverfisstofnunar segir að í rannsókn á svæðinu hafi mælst mikill styrkur PCB efna. Styrkur mengunarinnar bendir til að hvorki sé æskilegt fyrir fólk né dýr að dvelja á svæðinu nema í stutta stund og forðast beri að neyta gróðurs og yfirborðsvatns.
Rannsóknin var framkvæmd af The Royal Military College of Canada árið 2017.
Blý, sink, úran, kvikasilfur og olíuefni
Einnig fundust önnur mengandi efni á svæðinu í styrkleika sem getur haft áhrif á menn, dýr og náttúru. Meðal þessara efna eru blý, sink, úran, kvikasilfur og olíuefni.
PCB eru þrávirk efni sem safnast upp í fituvefjum og geta haft ýmiss konar skaðleg áhrif á heilsu og umhverfi. Sum PCB efni eru þekktir krabbameinsvaldar. Meðal annarra þekktra áhrifa þess að vera útsettur fyrir efnunum til lengri tíma eru skaðleg áhrif á æxlun, þroska og mótstöðuafl gegn sjúkdómum.
Aðgerðir í undirbúningi
Umhverfis-, orku- og loftslagsráðuneytið hefur falið Umhverfisstofnun að hafa umsjón með undirbúningi að frekari rannsóknum á svæðinu ásamt því að upplýsa um hættuna sem er fyrir hendi.
Stofnunin vinnur að undirbúningi málsins í samstarfi við landeigendur, rannsóknaraðila, viðeigandi stofnanir og ráðuneyti og með tilliti til styrks mengunar á svæðinu hefur Umhverfisstofnun látið reisa skilti þar sem fólk er beðið að gæta fyllstu varúðar við ferðir um svæðið.